Exodus 29

Ukugcotshwa kwabaphristi

1“Lokhu yikho ozakwenza nxa ubagcoba ukuze bangisebenzele njengabaphristi: Thatha inkunzi esencane lezinqama ezimbili ezingelasici. 2Yenza isinkwa ngefulawa ecolekileyo engelamvubelo, lamakhekhana axutshwe ngamafutha lezinkwana ezigcotshwe ngamafutha. Konke lokhu ukwenze ngefulawa ecolekileyo, 3ukufake esitsheni sinye ukulethe kuphakathi kwaso uze lakho kanye lenkunzi lezinqama ezimbili. 4Emva kwalokho letha u-Aroni lamadodana akhe esangweni leThente lokuHlanganela ubagezise ngamanzi. 5Thatha izambatho ugqokise u-Aroni ibhatshi, lengubo efika phansi yesambatho samahlombe, isambatho samahlombe sona ngokwaso kanye lesigqoko sesifuba, umbophele isambatho samahlombe ngebhanti lokhalo elelukwe ngobungcwethi obukhulu. 6Mthwalise iqhiye yokuthandela ekhanda lakhe unamathisele umqhele ongcwele wamakhosi eqhiyeni.

7Thatha amafutha okugcoba umgcobe ngokuwathela phezu kwekhanda lakhe. 8Letha amadodana akhe uwagqokise amabhatshi

9ubabophe ngamabhanti emakhanda, u-Aroni lamadodana akhe, ube usubathwalisa izingowane. Ubuphristi ngobabo ngesimiso esingapheliyo. Ngale indlela uzagcoba u-Aroni lamadodana akhe.

10“Letha inkunzi phambi kweThente lokuHlanganela, u-Aroni lamadodana akhe babeke izandla zabo phezu kwekhanda layo,

11uyihlabe phambi kukaJehova esangweni leThente lokuHlanganela. 12Thatha igazi lenkunzi ulininde ezimpondweni ze-alithare ngomunwe wakho, uthele igazi eliseleyo phansi e-alithareni. 13Emva kwalokho thatha lonke idanga eligoqela ezangaphakathi, lamahwahwa akuzo, utshise konke lokhu e-alithareni.

14Kodwa-ke inyama yenkunzi, isikhumba sayo lomswane wayo, kutshisele ngaphandle kwesihonqo; kungumnikelo wesono.

15“Thatha enye yezinqama, u-Aroni lamadodana akhe babeke izandla zabo phezu kwekhanda layo, 16yihlabe, uthathe igazi layo ulichele emaceleni wonke e-alithare. 17Emva kwalokho hlahlela inqama ibe yiziqa ugezise okwangaphakathi lemilenze ukufake ndawonye lenhloko kanye lezinye iziqa, 18ubusutshisa inqama yonke e-alithareni. Lokhu kungumnikelo wokutshiswa kuJehova – iphunga elimnandi, umnikelo onikelwa kuJehova ngomlilo.

19“Thatha enye inqama, u-Aroni lamadodana akhe babeke izandla zabo phezu kwekhanda layo. 20Uyihlabe, uthathe igazi layo ulininde olwangeni lwendlebe yokunene ka-Aroni lakwezamadodana akhe, lasezithupheni zabo zezandla zabo zokunene, lasemazwaneni amakhulu ezinyawo zabo zokunene. Emva kwalokho chela igazi emaceleni wonke ealithare.

21Thatha igazi elise-alithareni lamafutha okugcoba uchele u-Aroni lezambatho zakhe kanye lamadodana akhe lezambatho zawo. Lapho-ke yena lamadodana akhe lezivunulo zabo kuzabe sekungcwelisiwe.

22“Thatha amahwahwa ale inqama, lomsila ononileyo, ledanga eligoqela ezangaphakathi, lamahwahwa angaphezu kwesibindi, lezinso zombili lamahwahwa akuzo kanye lomlenze wokunene. (Le yinqama yokugcotshwa komphristi.) 23Esitsheni esilesinkwa esingelamvubelo esiphambi kukaJehova, thatha isinkwa esisodwa, lekhekhe elenziwe ngamafutha kanye lesinkwanyana. 24Konke lokhu kufake ezandleni zika-Aroni lezamadodana akhe, ukuphakamisele phezulu phambi kukaJehova kube ngumnikelo wokuzunguzwa. 25Emva kwalokho kuthathe ezandleni zabo ukutshise e-alithareni ndawonye lomnikelo wokutshiswa ukuba kube liphunga elimnandi kuJehova, umnikelo onikelwa kuJehova ngomlilo. 26Emva kwalokho thatha isifuba senqama yokugcotshwa kuka-Aroni uzunguze phambi kukaJehova njengomnikelo wokuzunguzwa, sizakuba yisabelo sakho.

27“Ngcwelisa lezozitho zenqama yokugcotshwa komphristi ezingezika-Aroni lamadodana akhe – isifuba esizunguziweyo lomlenze onikelweyo. 28Lokhu kuzaqhubeka kokuphela kuyisabelo sika-Aroni lamadodana akhe esivela kuba-Israyeli. Kungumnikelo aba-Israyeli abawenzayo kuJehova uvela kumnikelo wabo wokuhlanganyela.

29“Izambatho zika-Aroni ezingcwele zizakuba ngezezizukulwana zakhe ukuze bagcotshwe babekwe ubuphristi begqoke zona.

30Indodana yakhe ezakuba ngumphristi esikhundleni sakhe izazigqoka izinsuku eziyisikhombisa lapho isiza eThenteni lokuHlanganela ukuzakhonza eNdaweni eNgcwele.

31“Thatha inqama yokugcotshwa komphristi uyiphekele endaweni engcwele.

32Inyama yenqama lesinkwa esisesitsheni u-Aroni lamadodana akhe bamele bakudlele esangweni leThente lokuHlanganela. 33Bamele badle leyominikelo okwenziwa ngayo inhlawulo yokubekwa lokugcotshwa kwabo. Kodwa omunye umuntu nje akayikukudla lokhu ngoba kungcwele.

34Njalo uma enye yenyama yenqama yokugcotshwa komphristi kumbe isinkwa kusele kuze kube sekuseni, kutshise ngomlilo. Akumelanga kudliwe ngoba kungcwele.

35“Menzele-ke u-Aroni lamadodana akhe konke engikulaye khona, uthathe izinsuku eziyisikhombisa begcotshwa. 36Nikela inkunzi izinsuku ngezinsuku njengomnikelo wesono wokwenza inhlawulo. Yenza i-alithare libe ngcwele ngokulenzela inhlawulo, uligcobe ukuba ulingcwelise. 37Yenza inhlawulelo yealithare okwezinsuku eziyisikhombisa ulingcwelise. Lapho-ke i-alithare lizakuba ngcwele kakhulu kuthi konke okulithintayo kube ngcwele.

38“Lokhu yikho ozakunikela e-alithareni njalonjalo usuku ngalunye: amazinyane ezimvu amabili alomnyaka owodwa ezelwe. 39Nikela elilodwa ekuseni, elinye unikele ngalo kusihlwa.

40Kanye lezinyane lakuqala nikela lesilinganiso esiyingxenye eyodwa etshumini, ifulawa ecolekileyo ihlanganiswe lokwesine kwehini lamafutha e-oliva ahluziweyo, lokwesine kwehini yewayini ukuba kube ngumnikelo onathwayo. 41Elinye izinyane linikele kusihlwa ngomnikelo ofanayo wamabele kanye lomnikelo onathwayo njengekuseni ukuba kube liphunga elimnandi, umnikelo onikelwa kuJehova ngomlilo.

42“Kuzizukulwana ezizayo umnikelo wokutshiswa lo uzakwenziwa njalonjalo esangweni leThente lokuHlanganela phambi kukaJehova, lapho engizahlangana lawe khona ngikhulume lawe. 43Lapho futhi yikho engizahlangana khona lama-Israyeli, indawo leyo ingcweliswe yinkazimulo yami.

44“Ngokunjalo ngizakwenza iThente lokuHlanganela kanye le-alithare kube ngcwele ukuba bangisebenzele bengabaphristi. 45Laphoke ngizahlala phakathi kwabantu bako-Israyeli ngibe nguNkulunkulu wabo. 46Bazakwazi ukuthi mina nginguJehova uNkulunkulu wabo, owabakhupha eGibhithe ukuze ngihlale phakathi kwabo. Mina nginguJehova uNkulunkulu wabo.